هيا بنا نستهبل على بعض

انا حاسس ان موضوع الفنانة ميريهان ده بيدل على اننا كلنا كشعب بنستعبط على بعض. او اننا كلنا عبط لدرجة خطيرة جدا تستدعي ادوية. عايز تعرف ليه، الحكاية اول ما حصلت الناس اتقسمت نصين وكل نص حكاها بشكل وكل حكاية منهم وهمية وخيالية ومستقاة من الدراما المصرية.

الطرف المؤيد للفنانة حكى الحكاية كالآتي: هي وقفوها في كمين والضابط عاكسها مدتلوش ريق حلو قام ضاربها وعذبها واتلم عليها العساكر والضباط واعتدوا عليها وخدوها القسم ورموا عليها جردل بول ومسكوها من اماكن حساسة والستات غنولها يا حلوة يا بلحة يا مقمعة وضربوها وحرقوها واغتصبوها وقتلوها وهي الآن حزينة. وانا دلوقتي حيادي مع الارهاب وكبه كده وسم عليكم. وأي حد هيعترض على الرواية دي يبقى مع القمع وما كانوا يروحوا يتشطروا على الارهابيين في سينا بدل ما يتحرشوا بالنسوان.

الطرف اللي ضد الفنانة يحكي كالآتي: هي كانت راجعة في وقت متأخر عشان هي ست بطالة وكانت جاية من اماكن بطالة بتعمل فيها افعال بطالة وكانت شايلة قزايز حاجات بطالة وبتشرب منها بطريقة بطالة. دخلت في الكمين دخلة بطالة وكسرت الحاجز وداست على الضابط دوسة بطالة وخربشت العسكري في وشه شوهته وضيعت مستقبله الفني وضربت اربعة وكومت ستة على الارض وشتمتهم بالأب والقمع من الباب للطاق وهم يعيطوا ويقولولها بلاش كفاية. وأي حد هيعترض على الرواية دي يبقى ضد اللي واقفين في سينا وبيضربهم في ضهرهم.

عادي على فكرة. امريكا شخصيا فيها جدل على عنف الشرطة وفيديوهات وكل الحاجات دي. وعادي برضه فيه ناس هناك بتأفور من الناحيتين. اللي مش عادي بقى ان هناك وفي اي حتة فيه ناس كتير في النص فاهمة ان القصة لا حصلت كده ولا حصلت كده. فيه كتلة ضخمة فاهمة ان مينفعش يتسكت على تجاوزات الشرطة اللي مهمتها المفروض حماية المجتمع مش التهجم عليه وفاهمين كمان ان شكل التجاوزات مش عامل زي لما كانوا بيعذبوا نادية الجندي وبالتالي فمفيش داعي نقوم نحرق هالمدينة. في مصر الطرفين مصرين ميكونش الوسط ده موجود مش مسموحلك تنادي بإصلاح ومحاسبة لأن من ناحية هيعتبروك بتخون شهداء الارهاب ومن الناحية التانية هيعتبروك دولجي وعكاشة واحمد موسى لو مقولتش قوم نحرق هالمدينة. ابتزاز رخيص كل محصلته تأخر البلد. بس كان ممكن التغلب عليه لو فيه فعلا كتلة وسط طاغية. بس مصر مفيهاش، مصر متربية على الدراما وكل المصريين دراما كوينز.

القصة كما حدثت في الغالب هي: دخلت الكمين (ومش سكرانة ولا معاها خمرة)، وقفوها، معجبهاش، انت مش عارف انا مين، داست بنزين، وقعت اقماع وخبطت في رجل ضابط (موقعش)، على صوته، شتمته، ضربها بالقلم وجرها من العربية، طوحت فيهم الشتيمة، ناس جت فكت دا من ده، كبرت في دماغ الضابط ازاي ست تضربه، اللي في الشارع وقفوا معاه عشان هي اكيد بطالة انها مروحة متأخر، اخدها عالقسم، جودوا بموضوع الخمره، جه نقيب الممثلين بالمحامي، المحامي قالها لبسيه تهمة عشان تبقى سيب وانا اسيب، قالت مسكني من اماكن حساسة وترتر علي وحلوة يا بلحة يا مقمعة.

هو دا اللي غالبا حصل واللي اي حد عايش في مصر هيبقى عارف انه غالبا اللي حصل. طيب ليه الطرفين بينكروا؟ ايه داعي الاستهبال يعني؟ اصل الاستهبال هيخسرك في الآخر. انت كواحد بتاع شرطة في الشارع واحدة كسرت الحاجز وخبطتك انشالله خدشة بسيطة. من حقك تطلعها من العربية وترزعها على الأرض وتثبتها وتكلبشها وتديها بالصاعق لو بتقاوم وبعدين تروح القسم تقول اللي هي عملته وهناك هم يشوفوا. بتضربها بالقلم ليه؟ ماهو كده الموضوع باظ وخرج عن حدود انك بتحاول تسيطر عليها وبقت خناقة وناس بتحجز، طب ايه لازمة الحركة القذرة اللي كلنا فاهمينها بتاعت الخمره؟ ما دي بتسحب من ثقة الناس. انا شخصيا مبقيتش ضامن اي واحدة من عيلتي بعربيتها لو وقفتوها هتعملوا معاها ايه وهتحددوا ازاي هي مؤدبة ولا بطالة.

أما عن مريهان فانا فاهم جدا انها لازم ترمي بلاها لأن دي الطريقة الوحيدة اللي هم سايبينهالنا عشان نعرف نخرج بتصالح، الدولة بتغصبك على سيب وانا اسيب. انما اللي مش فاهمه اللي متعاطفين معاها مصدقين القصة كده فعلا؟ يعني عبط ولا بيستعبطوا؟

ارجو ان الطرفين يكونوا بيستعبطوا