محاسبة مجيدة خيانة

مناصري ثورة يناير بيتريقوا على نظريات المؤامرة اللي بتقول ان الثورة كانت مؤامرة. وانا معاهم. ماشي مفيش دليل حاسم ان الثورة على الأقل في بدايتها او في اغلب اللي نزلها كان فيها نية المؤامرة.

الغريب بس في الموضوع ان نفس الناس دي بتقول ان الثورة اتخانت وسرقت من الاخوان ومن العسكر ومن الفلول ومن الشعب ومن اي حد معدي من جنبهم في الشارع. وده في حد ذاته ايمان بمؤامرة كونية واسعة تتضمن أطراف متعددة ملهاش مصالح مشتركة كلها بتعمل اذ فجأة مع بعض عشان يخونوا الشباب الطاهر وثورته.

بينما الحقيقة واضحة وبسيطة للي عايز يشوفها. بس هي يمكن مؤذية. الثورة مولودة بأسباب فشلها ومش محتاجة حد يخونها هي مدمرة نفسها بنفسها.

ثورة يناير ثورة بلا أهداف محددة ولا قيادة واضحة ولا طرح لبديل.

اللي قدمته يناير هو مطالب بإسقاط أشياء وإقصاء أشخاص زائد شعار مبهم عن حرية وعدالة اجتماعية ما تمش تعريف أيه هم. ثورة يناير طلبت يوتوبيا ومقالتلناش نحققها ازاي. ولما يناير الأصلية اتزنقت في سؤال ايه هو البديل حولت الموضوع برمته لعملية فيها التار (تحت مسمى القصاص) هو الهدف والنهاية. وعزل أشخاص بناء على معايير غير معرفة لأنهم "فلول" هو المطالب.

في غياب اي أهداف او بديل مكانش مطلوب من الاخوان انهم ميحاولوش يبلعوا البلد في كرشهم. الاخوان مخانوش. هم لقوا اللي عمل تفضية الساحة ليهم قضيته. يبقى حرام لو رفسوا النعمة. الاخوان من اول يوم هدفهم دولة البنا الميليشياوية. كانوا عايزينها بالتدريج لكن النشطاء فضولهم السكة تماماً. وخلاف النشطاء مع الاخوان مش خلاف على شكل الدولة اللي بناها الاخوان، لكن خلاف ان الاخوان كان لازم يركزوا اكتر في "إقصاء الفلول" و "القصاص". يعني لو الاخوان كانوا "طهروا الداخلية" كان النشطاء هينبسطوا منهم، بغض النظر عن ان التطهير ده في الغالب كان هيبقى عبارة عن استبدال بعناصر موالية للاخوان.

احنا وصلنا لنفس النقطة تاني. نشطاء الثورة مش عاجبهم السيسي يمسك. معندهمش بديل. كالعادة عارفين مش عايزين ايه ومش عارفين عايزين ايه. وكالعادة هيدعوا انهم اتخانوا. محدش خانك يا ابني، انت اللي مش عارف عايز ايه.

الحاجة التانية امتى ممكن محاسبة يناير؟ مش المحاسبة من الحاجات المهمة؟ هل يناير معصومة؟

كلمات: اصل الثورة محكمتش اصل النظام لسه لم يسقط اصل الدولة العميقة اصل معرفش ايه مبقتش تأكل عيش. الاول قالك لا شفيق مبارك بيمليه من شمر الشيخ لازم رئيس وزراء من الثورة. مكنتش خالتي اللي اختارت زفت الطين عصام شرف، كان الميدان. ولما شرف عك عك تاريخي قلتوا لا يمثل الثورة.

لما مرسي اتقال عليه مرشح الثورة وكلكم وافقتوا ودعمتوه محدش ضربكم على أيديكم أنكم تقولوا كده. لما مرسي فشل فشل ثلاثي الأبعاد قلتوا مرسي لا يمثل الثورة.

طيب ايه رأيك منعتبرش ان الثورة حكمت الا لما تيجي حكومة كلها من الشباب وكلهم من اللي كانوا في الميدان في ال١٨ يوم؟ طيب ايه رأيك في حكومة قنديل الاخيرة؟ ما هي ينطبق عليها المعيارين دول بامتياز.

ايه؟

لا يمثلوا الثورة؟ طب مين بيمثل أمها؟ امتى نقدر نسأل يناير هي عملت ايه وليه؟

ممكن نسألها عن انها وصلت الاخوان للحكم. هتقولي لا اصل طنطاوي هو اللي سلمهم الحكم/ لا اصل مبارك هو اللي رعى الاخوان/ اصل الاخوان أصلا جزء من نظام مبارك.

طب ينفع نحاسبكم أنكم فضلتوا في الميدان عشان تطلعوا إرهابيين من السجون تحت مسمى الإفراج عن معتقلين. وإنكم قلتوا لازم كل الإرهابيين يرجعوا من بره لأنهم مصريين ولو الحكومة عندها ضدهم حاجة تقدمها؟ لا مينفعش؟

طب نسألكم على ايه امتى؟

يناير واقع وماضي. انا ضد الفلول اللي لسه عايشين في لحظة التنحي وكل همهم انهم يشمتوا في المترتب عن تنحي مبارك بالشكل ده. وممكن أتكلم معاك في يناير ونحاول نلاقيلها إيجابيات او مكاسب. ومؤمن تماماً ان اغلب اللي نزل كان نيته كويسة. إنما الحقيقة الموجة اللي انا شايف بدايتها بتاعت الابتزاز بالثورة المجيدة وانت ضدها ولا مش ضدها دي تبلوها وتشربوا ميتها.

طز في مجيدة بتاعتكم وإرهابها الفكري