هل سبيت الدين لمجيدة اليوم؟

من الحاجات اللي كانت محيراني هل المفروض اننا نضيع وقت في توضيح ليه يناير كانت خطأ ولا نبص لقدام ونسيب الناس اللي شاركت فيها تعيش شوية أوهام عن مجيدة الشريفة العفيفة اللي الكل خانوها. سؤال معقد لكن أخيرا لقيت له إجابة:

اشتموا مجيدة

اشتموها في الصباح والمساء

اشتموها على قرعات الطبول

اشتموها على أنغام المزامير

اشتموها على نقر القانون

اشتموها

ليه؟ عشان لو مشتمناش مجيدة ونفضناها ومسحنا بكرامة أمها الأرض هتفضل الناس عايشة في أوهام مجيدة وتواكل مجيدة وعدمية مجيدة وهتفضل القيادات عايشة تحت ابتزاز مجيدة ومحاذير مجيدة. مجيدة أولادها ربطوها بخرافاتها وقرفها وعشان كده لازم كلنا نندم على مجيدة.

لو مجيدة متشتمش هنفضل عايشين في سراب جبال الذهب المهدرة والشمس اللي هتأكلنا فزدق وأراضي الدولة الفظيعة الفشيخة في قيمتها اللي اتنهبت. هنفضل عايشين كده عارضين أراضي الصحراء عديمة القيمة على ناس بفلوس كتير وهم يبصولنا كأننا مجانين ويروحوا يستثمروا في بلاد تانية.

هيفضل السيسي يهلفط بكلام اشتراكي عبيط وهيفضل يخضع لابتزاز فرض ضرائب تصاعدية بدل البحث عن إصلاح الوعاء الضريبي وتوسيعه والتسهيل على الممولين ومحاربة فساد المصلحة. ليه؟ لأن ده اللي عمله مبارك ومجيدة قالت مبارك كان وحش والسويد فيها ضرائب تصاعدية. يبقى لازم نعمل كده.

هيفضل السيسي مركز على مشاريع عملاقة راح وقتها بدل تشجيع المستثمرين اللي طفشوا انهم يفكروا يرجعوا. ليه؟ أصل المستثمرين وحشين ولازم نفشخهم، عشان مجيدة قالت ان الدولة مش واخدة حقها منهم. عامة أهم سابولكم الدولة مخضرة وراحوا بلاد تانية مصابهاش مجيدة.

لازم العيل أبو جينز اللي كان بيشتغل في مالتي ناشونال ونزل مجيدة عشان حاسس انه مش واخد حقه يعرف انه كان واخد أكتر من حقه. والدليل ان الشركة رفدته وعملت داون سايزنج وراحت دبي.

لازم البهايم اللي كانوا بيتريقوا على معدلات النمو أيام مبارك يعترفوا انهم بهايم وان معدلات النمو مكانتش وهمية. والدليل ان لما معدلات النمو الوحشة بتاعت مبارك راحت في الوبا مبقاش فيه فلوس ولا شغل ولا حركة ومبقيتش عارف هتدفع قسط المدرسة الانترناشونال اللي بتتمنظر انك مدخل ولادك فيها منين.

لازم كل ما النور يقطع تشتم مجيدة وتعرف ان مبارك كان عنده خطط لزيادة انتاج الكهرباء ماشية طول الوقت. والدليل ان الأزمة عمرها ما كانت بالسوء ده قبل مجيدة على الرغم من تزايد الاستهلاك بنفس النسب كل عام.

لازم تعترف ان القطاع العام مش ثروة وان الخصخصة هي اللي انقذت الباقي المتبقي من الخدمات في البلد.

لازم كل ما عسكري يستشهد ولا اسلامجي يموت تعترف ان السلم الأهلي كان ثروة وانك رفستها برجلك.

لازم لما تلاقي الانترنت غالي ومفيش شركة راضية تستثمر 4G بقالهم تلات اربع سنين في مصر تعترف ان مبارك كان مخليك تنافسي في مجال الاتصالات.

لازم لما تلاقي المورد الأجنبي بيقولك عايزين كاش تعترف ان الاستيكرار اللي اتريقت عليه أيام مبارك تمنه فلوس. فلوس ليك ولولادك ولحياتك.

لازم تعترف بالحقيقة اللي واضحة زي الشمس: مجيدة خلت حياتنا كلنا أسوأ بمراحل. مجيدة خطأ. ما قبل مجيدة في أغلب الحالات كان صح. كلنا بنفتكر ٢٠١٠ بمشاعر حنين. لما بنشوف أفلام من ما قبل مجيدة بنتحسر على دي أيام. كلنا بنبص لحدود ٢٠١٠ انها هدف.

لما نعترف بكل ده هنقدر نستخدم الأدوات الصح وهنتخلص من قيود مجيدة.

لذا أنا النهارده أدعوكم لشتيمة مجيدة ولشتيمة أم السيسي لغاية ما يبطل يقول عليها مجيدة ويبطل يخاف يعترف ان مبارك في كثير من الأحيان كان صح.