لكم دينكم

التكفيريين صح. 

بقالنا عقود من الزمن بنحارب وننحر قلبنا مع الاخوان والسلفيين والجهاديين والقاعدة والتكفير والهجرة وداعش وماعش وواغش. يابني بلاش تكفر الناس. يابني يا حبيبي كده كخ، كده عيب. شوية يبخ فيك عيل جهادي ويوعدك بالقتل، وشوية واحد اخوانجي مزيت يقعد يطرطش سمنة عليك ويتوهك في الكلام وفي الاخر تكتشف برضه انه بيقول انه هيقتلك لو معملتش اللي بيقولك عليه.

طب وليه؟ واحنا علينا من ده بإيه؟ هو الهدف ايه؟ انهم يثبتوا ان اللي انا مؤمن بيه غير اللي هم مؤمنين بيه؟ طب ما انا عارف! هم معاهم حق على فكرة. انا فعلا كافر باللي هم بيقولوه ده ومش عايز اي حاجة منه.

عارف الدين اللي بيقول ان ربنا بيزعل من الموسيقى والفن ده؟ انا مش مؤمن بيه.

عارف الدين اللي بيقول ان ربنا خلق الستات عشان يعذبهم ويخليهم عار وعورة وكائنات تابعة جاهلة خاضعة ده؟ انا مش مؤمن بيه.

عارف الدين اللي بيدي الراجل حرية انه يرمي مراته في الشارع او يتجوز عليها بدون موافقتها او حتى حقها في الانفصال؟ انا مش مؤمن بيه.

عارف الدين اللي بيقطع راس الناس اللي مش عايزين يفضلوا فيه؟ انا مش مؤمن بيه.

عارف الدين اللي بيدي اتباع الأديان الاخرى حريتهم الكاملة ... في انهم يعتنقوه او يتقتلوا؟ انا مش مؤمن بيه.

انت فاهم قصدي. فكرتي وصلتلك. انا مش مؤمن بالحاجات دي. مش عايز اتناقش فيها. لا انا اصلا مش مفتوحة للنقاش عندي. كل ده مش عندي اساسا. السكرين شوتس اللي الملحدين والدواعش بيجيبوها لي من كتب ابن تيمية وابن القيم متسواش عندي نكلة. انا مش مؤمن بيها.

الخلاف دايما كان هل انا وداعش وروافدها مؤمنين بنفس الدين لكن واحد فينا ضال؟ داعش ومن لف لفها كان طول الوقت رأيهم انه لأ. ويوافقهم الرأي النهارده الملحدين. هم شايفين ان داعش هم الاسلام الصح وانا لأ. وانا قررت أوافق. انا موافق يا جماعة، انا كافر بما تؤمنون به. سموني مسلم وسموا نفسكم حاجة تانية. او بلاش سموا نفسكم مسلمين وسموني حاجة تانية. او احنا الاتنين نسمي نفسنا مسلمين واحنا الاتنين نكفر بعض.

معنديش مشكلة انك تكفرني. انا فعلا كافر بدينك. انما عندي مشكلة انك تقول علي مرتد. انا عمري اساس ما امنت باللي انت بتقول عليه ده. محدش ابدا اتفق معاي على كده. انا اهلي ضحكوا علي وانا صغير وعلموني دين فيه مساواة ومساعدة للضعيف وحرمة للموت واحترام للانسانية بلا تفرقة واعتماد على الحجة والنقاش وحب للجمال. انا يا جماعة علموني ان فيه رب بيرزق الدودة في الارض مش بس الذكور السنة الوهابيين. وهو ده اللي انا مؤمن بيه ومفيش أي قدر من السكرين شوتس الملحدين والدواعش هتغير ده. هو الاسلام الكيوت اذا، هو ما امنت به من ساعة ما اتولدت ومرتدتش في يوم من اسلام الكورة بروس الناس لأني في يوم ما آمنتش بيه.

الحل ايه؟ انا شخصيا معنديش اي مشكلة اني اعيش مع ناس انا مش مؤمن بدينهم واحبهم وأصاحبهم واحترمهم لأن ده اللي اتعلمته من الاسلام الكيوت. وبالتالي معنديش مشكلة خالص اني اعيش مع أتباع الاسلام الداعشي وروافده. المشكلة ان هم اللي عايزين يموتوني أنا وأي حد لا يؤمن بالإسلام الداعشي وبينفذوا في ده حاليا.

أنا مش عايزك تموت عشان أفكارك غير أفكاري. أنا عايزنا احنا الاتنين نعيش بمعتقداتنا. لكن إذا كانت الخيارات اللي انت بتطرحها هي إما اني أموت أو انت تموت. فأنا أفضل إن انت تموت.