أسماء الفرعون

الفرعون كلمة وحشة. دا ميراث من الديانات الإبراهيمية وليس مبني على قراءة واقعية للتاريخ أو لدور الملك في مصر. دور الملك كان مركب وليه علاقة بدور كل الناس في الحياة وباعتبار المصريين القدماء ان كل حاجة هي انعكاس للعالم الآخر وكل حاجة تنعكس في العالم الآخر. أنا مش هحاول أشرح دور الملك في مصر القديمة لكن هتكلم عن أسماء الملك في مصر القديمة كطريقة لفهم الأدوار اللي كان بيلعبها وتطورها مع التاريخ.

أولا كلمة فرعون. هي مشتقة من كلمة مصرية قديمة مكونة من رمزين هيروغليفيين:

پر عا. پر بمعنى بيت وعا بمعنى العظيم. پر عا معناها البيت العظيم وكانت إسم القصر الملكي، لكن في المملكة الحديثة بعد طرد الهكسوس ابتدأ استخدامها في مناداة الملك نفسه. ونتيجة طرد القبائل السامية مع الهكسوس انتقل استخدام التسمية للديانات الإبراهيمية. لكن پر عا لا هو أقدم ولا أهم ولا أشهر أنواع الأسماء للملك ومكانلوش أي مدلول روحاني.

حسب تقاليد المملكة الوسطى الملك كان له خمس أسماء: حور (حورس)، نبتي (السيدتين)، حور نبو (حورس الذهب)، نسوت بيتي (ذو الخوص والنحلة)، زا رع (ابن رع).

اسم حورس:

اسم حورس هو أقدم اسم مسجل لملوك مصر من عهد ما قبل الأسرات وفضل كل ملوك مصر يكون عندهم اسم حورس لغاية نهاية عهد ما بعد الأسرات. اسم حورس كان بيميزه دايما ان قبل الإسم بيكون فيه الرمز الهيروغليفي لحورس:

وبعد الرمز ييجي الإسم. ومن أقدم الملوك في مصر ملك مسجل إسمه:

أو حور عحا. حورس المحارب. الربط بين الملك وحورس ربط وثيق لأن حورس رمز للانتصار على الانقسام بين الشمال والجنوب وبالتالي توحيد البلاد وحكمها. حورس هو رمز للقوة والشباب والدولة والوحدة. والمصريين مكانوش بيشوفوا ان الملك بالفعل هو حورس لكن كانوا بيشوفوه انعكاس لما يمثله حورس في أرض مصر.

الإسم النبتي (السيدتين):

بالمصري القديم نب يعني سيد أو رب. بإضافة تاء التأنيث نبت يعني سيدة أو ربة. وبإضافة ياء التثنية نبتي معناها الربتين أو السيدتين. والسيدتين هنا هم نخبت (العقاب) ووادجت (الكوبرا). سيدتين لهم حيوانين رمزيين يرمزوا للوجهين البحري والقبلي. ولذا من القديم تمثيل مصر في شكل سيدة موجود في الوعي. قبل كتابة اسم السيدتين للملك كان رمز العقاب والكوبرا بيتحط بالشكل الآتي.

اسم حورس من الذهب:
وكان قبل الإسم دا دايما فيه رمز حورس يقف على ذهب.

الذهب عند قدماء المصريين كان يرمز للنصر والتفوق والدوام. ففي الغالب اسم حورس من الذهب كان بيستخدم للكلام عن انتصارات وإنجازات الملك.

نسوت بيتي (ذو الخوص والنحلة):
نسوت بيتي هو اختصار لجملة معناها صاحب الخوص والنحلة. الخوص كان يرمز للوجه القبلي والنحلة للوجه البحري والملك هو موحد وحاكم الوجهين. الإسم ده هو اسم العرش للملك اللي كانوا بيعطوه له عند تتويجه، في مصر القديمة كان ده أهم اسم من أسماء الملك الخمسة. كان قبل الإسم دايما يتحط رمز الخوص والنحلة.

اسم زا رع (ابن رع):
دا كان اسم الملك عند المولد قبل ما يتعرف انه بالضرورة هيكون هو الفرعون. هو دا الإسم اللي بنعرفه تاريخيا لملوك مصر. طبعا عند القدماء كان اسم المولد بيتكرر لملوك كتير لكن توفيقة الخمس أسماء لا يمكن تتكرر. لكن بالنسبة لنا ونتيجة اختيار العلماء الغربيين بقينا نسمي الملوك بإسم الميلاد زائد رقم، مثلا رمسيس التاني. اسم ابن رع لازم يسبقه رمزين يقرأوا زا رع.

اسم الميلاد واسم التتويج كانوا بيتكتبوا داخل ما يسمى بالخرطوش أو بالمصري القديم ما يسمى السرخ. والخرطوش في تدويرته يرمز للاستمرارية زي علامة الما لا نهاية.



كمثال أسماء تحتمس الثالث:
اسم حورس

حور كاناخت خا إم واسط = حورس الثور القوي، الذي يشرق في طيبة

اسم النبتي

 نبتي واه إن سيت مير رع إم پت = هو صاحب السيدتين طويل الملك كمثل رع في السماء

اسم حورس الذهب

حور نبو سخم پاهتي دچسر خاو = حورس الذهب شديد القوى مقدس الطلعة

اسم العرش

نسوت بيتي من خپر رع = هو صاحب الخوص والنحلة هيئة رع الخالدة

اسم الميلاد

زا رع تحت مسس نفر خپرو = ابن رع المولود لتحوت (تحتمس) جميل الهيئة