انا هنتخب السيسي

لما اتسأل سؤال بجاوب على السؤال اللي اتسأل. هي دي فلسفتي من ساعة النجاح المبهر للثورة المجيدة. تقدملي مرشحين على مجلس الشعب فيهم عيل ينايرجي تافه وواحد سلفي للأسف هختار الينايرجي التافه. تسألني عايز شفيق ولا مرسي هجاوب بدون تردد شفيق. تسألني عايز دستور الاخوان اجاوبك لأ مش عايزه. تسألني عايز تعديلات لجنة الخمسين على دستور الاخوان ولا دستور الاخوان اقولك تعديلات لجنة الخمسين.

اه ممكن أكون مبعرفش أفكر خارج الصندوق وخيالي محدود، أو يمكن أكون شايف كل التفكير خارج الصندوق في الفترة الماضية غير مثمر وكل الخيال مصاب بالخبال.

لذا السؤال الحالي واضح لي. عايز حمدين ولا السيسي؟ بس كده. بالنسبة لي هعمل زي ما عملت في كل صندوق من ساعة مجيدة ما نجحت حتى في إعادة الشورى اللي تقريبا رحتها لوحدي: هروح انتخب من المتاح. هسيب الخيال للناس اللي مش عاجبها الاتنين والناس اللي عايزة ترجع فلان والناس اللي شايفة الحل في الشارع لنا وانزل زي ما نزلت قبل كده.

وإجابتي هتكون اني عايز السيسي رئيسا للفترة الرئاسية الجاية. عندي أسبابي. أسباب كتير منها حاجات كويسة في السيسي وأسباب كتير تانية حاجات وحشة في حمدين. أنا معنديش أوهام ان السيسي خارق أو هيحل كل المشاكل وعارف كويس عيوب الجيش وعيوب ان واحد من الجيش يحكم. لكن مع وزن كل شيء بلاقي نفسي هنتخب السيسي. تاني لأن الخيار العدمي المراهق بتاع الاتنين وحشين مش في قاموسي.

أنا هقول أسباب قلقي من السيسي وأسباب إقبالي عليه، وأسباب تقديري لحمدين وأسباب رعبي منه. لكن في النهاية أنا مش شايف ان فيه إجابة صح. الناس تختار اللي هي عايزاه وتتحمل نتيجته. لكن زي ما قلت أيام الدستور اني معنديش مانع من تعديلات الخمسين أو الرجوع لدستور الاخوان لكن عندي مانع من أي سيناريو تالت فيه تعديلات على أساس مش واضح، أنا دلوقتي مستعد لتحمل اختيار الناس لكن معنديش احتمال لسيناريوهات ضبابية. لو حمدين كسب يبقى يحكم الأربع سنين وابقوا غيروه لو ندمتوا. وشرحه للسيسي. لو حمدين كسب أنا شخصيا مش عارف هقدر أقعد في البلد ولا لأ بس ده مش عقاب للناس على اختيارها (لأن أنا مش هدية يعني)، دا اختيار شخصي اني ماعيش التمن اللي لازم هيتدفع. واتمنى التوفيق لحمدين وهدافع انه يكمل مدته. ٣٠/٦ كانت حادث عارض فريد زي مجيدة وأي حد بيراهن على تكرارها مش هيوصل لحاجة.

ليه قلقان من السيسي

أنا جربت اشتغل مع الجيش وعارف كويس المشاكل اللي هتواجه واحد جاي من الجيش لما ييجي يتعامل مع المدنيين. السيسي متعود في الجيش على نظام صارم من الأوامر والتزام بمواعيد مش هيشوفهم خالص من مرئوسيه في الادارة المدنية ناهيك عن الشعب. زد على ده ان الجيش عنده مشاكل في تقبل النقد وعنده نقص في التخيل والحلول الابتكارية (نتيجة انه جهاز تقني بطبعه) وفشل في تقديم كتير من شغله بشكل احترافي يقدر يجتذب جمهور غير عسكري. المشروع اللي دخلته مع الجيش طلع نتايج هايلة لكن في نفس الوقت أقسمت اني مش هكرر التجربة نتيجة صعوبة تواصلي مع الناس اللي من الجانب العسكري.

فيه كمان حاجات من لقائاته التلفزيونية قلقتني. كمثال مش فاهم ليه الإصرار على محاولة زيادة الرقعة الزراعية وادعاء ان الإنتاجية الزراعية في مصر مش عالية. ده درب من الخيال يشترك فيه السيسي مع برامج المرشحين التانيين من بعد يناير. كنت أتوقع منه في الزراعة الحفاظ على الرقعة والموارد المائية الحالية وإصلاح نظام تمويل الفلاحين اللي فعلا مبقاش فيه سبب اقتصادي يدفعهم للزراعة. اترعبت من اعتماده في برنامجه على وعي غير موجود في الشعب المصري. السيسي متوقع ان الشعب فاهم انه لازم يتعب ويشتغل عشان يشوف نتائج وانه لازم يتحمل فترات صعبة عشان يؤمن لنفسه ولأولاده مستقبل أفضل. مين اللي خدع السيسي وقال له أن الشعب المصري شعب من شعوب أقصى الشرق الأسيوي؟ وبشكل متصل، منين الثقة ان المصريين بالخارج هيساهموا بأي شكل تطوعي أو حتى إجباري في تمويل التنمية في مصر؟ دا بمجرد تسريب تلميح لذلك انطلق الاستنكار منهم بكل الأشكال.

قلقان جدا من إن كتير من رؤية السيسي فيها دور كبير للحكومة. أنا أرى الحكومة فاشلة وفاسدة وكفائتها منخفضة بتعريفها. والسيسي ممكن ميكونش شايف كده لأن خبرته فقط مع ماكينة الجيش. أنا أريد حكومة صغيرة تهيء المناخ وتدير في الحد الأدنى وتتدخل فقط لحفظ حدود معينة عن طريق أدوات مثل التشريع والسياسة النقدية.

وفيه كمان حاجة أنا مش هخدع نفسي فيها. السيسي فيه قطاعات في المجتمع معادية له بشكل واضح. بالتحديد الإسلاميين وما يعرف ب"شباب الثورة" والطرفين بشكل واضح وصريح بيهددوا ان البلد لن ترى استقرارا لو تم اختيار السيسي. ودي حاجة تقلق مهما ادعينا انها متقلقش. أنا زي أي حد عايز هدوء للأوضاع وتوقف للمواجهات عشان عايز حياتي تبقى طبيعية وأكثر أمانا. لكن فيه هنا عندي مشكلتين. أنا أيام الدور التاني لانتخابات ٢٠١٢ صوتت لشفيق. لكن كان فيه شيء جوايا بيدعي إن شفيق يخسر. ليه؟ ببساطة لأني خفت من تهديدات الإخوان وشباب الثورة بحرق البلد إذا فاز شفيق. فضلت من جوايا وإن ادعيت العكس بشكل معلن ان من كنت متأكد أنه خائن فاشل يفوز على ان البلد تتحرق بي أنا وأهلي. لإمتى؟ هفضل شخصيا لإمتى أخضع للابتزاز ده واخاف واتمنى فوز ناس مش عايزها عشان ميحرقوش البلد؟ طب ما هم كده كده بيحرقوا البلد بسبب وبدون سبب! ثم ان هم ادولي بديل مقبول وقالولي انتخب ده بدال السيسي؟ لأ! ما نصهم عايز مرسي يرجع ونصهم عايزين ثورة تاني من جديد. لا معلش بالنسبة لي شخصيا الخضوع للتهديد ده: كان فيه وخلص.

ليه بحترم حمدين

أنا محترم حمدين جدا وفي ٢٠١٢ كنت اتمنى ان الاعادة كانت تكون بين حمدين وشفيق أو حمدين وموسى. ساعتها كنت مش هديله صوتي بس مكنتش هحس بقهرة انتخاب مرسي. ولو كان التصويت بين مرسي وحمدين كنت هنتخب حمدين بدون تردد. حمدين قرر يترشح ضد مرشح قوي وهو عارف ان فرصه ضعيفة جدا. ترشح حمدين وإدارته لحملة قوية سبب رئيسي في إننا بنلعب انتخابات بيراقب عليها وبيعترف بها مجتمع دولي. كان أسهل شيء على حمدين انه يفترض ان فرصه في النجاح منعدمة قصاد السيسي زي ما كتير غيره عملوا وينسحب ويخلي شكل البلد دوليا زفت. وما أسهل الانسحاب. لأن بعد الانسحاب بتيجي المزايدة. ممكن ينسحب ويقول ان الانتخابات تمثيلية زي ما غيره عمل. ممكن حمدين ومن يساندوه يقرروا انهم مش لاعبين ويلعبوا دور عواجيز الفرح اللي كتير من النشطاء وحتى الفلول قرروا يلعبوه. ولكن بما ان حمدين ومن يسانده قرر انه ينزل يبقى يصح انهم يلعبوا بجد. وهو ده اللي هم بيعملوه. بيهاجموا السيسي وبيمسكوله على الواحدة وبيبطحوا نفسهم وبيستفزوه وبيلعبوا على نقاط ضعفه هو وحملته. ودا الصح وبرافو عليهم وشكرا ليهم. حمدين مش نازل كومبارس، حتى لو منجحش هو مش كومبارس، هو بيلعب دور انه يحافظ على الانتخابات سباق صعب بيتعصر فيه المرشحين.

حمدين مش إخوان، ومش بيسانده الإخوان ومش هينتخبه الإسلاميين. ولو الإسلاميين رجعوا الحكم هيكون حمدين في تاني صف يتعلق على المشنقة بعد السيسي. حمدين سياسي بيلعب في المسرح المصري من زمان، ملوش خبرة إدارية لكن له خبرة في السياسة والنضال، أخطأ وأصاب زيه زي غيره. حمدين رسالته في دعم الأمن المصري واضحة ومحترمة وصريحة ولا تحتمل التأويل. يعترف بوجود الإرهاب وبدعم الجيش والشرطة الغير مشروط في محاربته. لا يوجد أثر لنظريات المؤامرة الحقيرة من نوعية أن الإرهاب خطة مخابراتية. حمدين متحدث لبق جذاب وكلامه مفهوم وبيدخل القلب. مشروعه وبرنامجه منمق ومكتوب بعناية، طموح، ويعد برخاء وتطور ومواكبة للعالم يستحقهم الشعب المصري.

لكن أنا لا يمكن انتخب حمدين

برنامج حمدين جميل بجد، بس متاخد من ويكيبيديا. باختصار هو قايل كلام سطحي جدا بيغطي التعريف العام للحاجات بدون أي ملاحظة للوضع في مصر. حلو قوي الكلام عن الاعتماد على صناعة البرمجيات، بس الكلام ده بتقوله الحكومة في الهند وغينيا الجديدة وتيمور الشرقية والنمسا وأي حتة. دا كلام انشا ميأكلش عيش قاله كل الناس وهيقوله كل الناس. وفي بعض الأحيان أصلا الكلام في البرنامج غلط من أساسه. مثلا بحكم تخصصي أجد ادعاء إن مصر لازم تكون رائدة في تصنيع الدوائر المتكاملة نتيجة توفر الرمال البيضاء كلام جاهل خاطئ بشكل لا يحتمل النقاش ومخادع. بنفس الشكل ادعاء ان الطاقة الشمسية هي حل مشكلة الطاقة في مصر في المدى القصير أو المتوسط أو حتى لمدة عقدين من الزمان هي خديعة تاريخية. وادعاء ان الشمس هتدي المصريين اللي البترول اداه للإمارات والسعودية هي مداعبة لحلم الكثير من المصريين بأن يكون هناك مادة خام يقوموا بتصديرها ليغتنوا بدلا من الأعمال ذات القيمة المضافة العالية اللي هي فعلا أمل مصر.

ليه مصر محتاجة غابات أصلا؟ وازاي هتستخدم مياه الصرف الصحي لروي الغابات بدون معالجة؟ ولو عالجت المياه متزرع بيها محاصيل؟ ليه البرنامج مبني على ما كان يتصوره نبيل فاروق حقائق علمية في ملف المستقبل؟

ليه خطاب حمدين مفيهوش أي جديد عن الخطاب الشعبوي لما بعد يناير؟ ليه ما زال مصر ان الزيادة السكانية مورد مش كارثة؟ ليه بيقول للشعب المصري أنه يستحق أن يغتني بدون العمل؟ هو التلات سنين اللي فاتوا كانوا صح؟ طب لو مكانوش صح ليه متعلمش منهم حاجة؟ هل فعلا الصناديق الخاصة هي اللي هتمول مصر؟ ايه هو تعريف الفساد اللي حمدين متصور انه هيسد الميزانية بيه؟ ليه بيقول نفس الكلام اللي قاله مرسي على البر ولما دخل غيره؟ ليه التأليب الطبقي؟ وما هو تصور حمدين لشكل مصر إذا هجرها الطبقة المتوسطة العليا والعليا، مش هيكون فيه نزف مريع للكوادر والمهارات شبه اللي حصل بعد ثورة يوليو؟

عشان كده انا هنتخب السيسي

أنا مش هضحك على نفسي. جزء من قراري الانتخابي هو الوضع الأمني. ممكن تقول اني بخضع لابتزاز وتقارني بالأمريكان لما خضعوا للابتزاز وانتخبوا جورج بوش مرة تانية. لكنك كالعادة هتكون مخطئ وبتقارن تفاحة ببرتقانة زي ما الأمريكان بيقولوا. أنا في بلد محاطة بحماس وإسرائيل والسودان وليبيا. كلها بلدان إما تتمنى تشوف مصر ضعيفة أو متتمناش تشوفها قوية أو مبقتش بلدان بعد ما الناتو فرشها بالأسلحة من غير ما يهتم هي رايحة فين. سوريا مش بعيدة عن تفكيري وسوريا في رأيي مكانش سببها هو عدم الرضوخ للمظاهرات لأن سيناريو سوريا يتكرر بشكل مختلف في اليمن التي رضخت. سوريا كان سببها تسليح طرفين من أطراف خارجية بحيث لم يستطع طرف من الاتنين التغلب والسيطرة وانقلب الموضوع لحرب أهلية متكافئة بالوكالة تعمل على تفتيت كل شبر في الأرض. أنا عايز واحد فاهم ان مصر في خطر داهم ومستعد يواجه الخطر ده مش شخص يعتقد اننا ممكن نمثل حركات الديمقراطية الغربية بشكل مسرحي مع جماعات طائفية بينما الواقع على الأرض هو فقدان للسيطرة. أنا عايز طرف لا يرى مساندوه أن يورو ميدان كان تحرك عفوي سلمي. مش لازم يكونوا شايفين بوتين كويس لكن شرط انهم لا يكونوا يروا أن التغيير على النمط الأوكراني ناجح أو أخلاقي هو الآخر.

أنا معنديش اهتمام حقيقي بحكاية ان السيسي يمحي الإخوان من الوجود أو لا. أنا اهتمامي ان السيسي مدرك أن المشكلة الحقيقية في الخطاب الديني والثقافي. لما السيسي قال أنه بيعتبر ان ده من ضمن مسئولياته غضب الكثيرون ممن يعتبرون ناصر مثلا والسادات مجرما لأنه لم يحارب الإسلام السياسي فكريا. أنا شخصيا مفهمتش ان السيسي هيحاول يخلي الدولة تحتكر الدين أو الثقافة، لكني فهمت أنه بوضوح معندوش أوهام ان الدولة عندها رفاهية انها تتجاهل ضرورة انها تبقى طرف قوي في صياغة الوعي الديني. أنا شخصيا علماني وأرى أن الوصول للديمقراطية على النمط الغربي يتطلب العلمانية والليبرالية قبل صندوق الانتخاب. لكن ده رأي تويتري بيأثر بحد أقصى في بضعة مئات الآلاف في مصر. في العشوائيات والقرى والأحياء العاملة العلمانية بعيدة كل البعد عن الواقع. الواقع هو ان المناطق دي بيسيطر عليها رجال دين بيلبسوا بنات في إعدادي النقاب. فمقدرش أطالب بدور للأزهر في ضبط الخطاب الديني ولما ييجي واحد واعي بده أنهار من أنه واعي. 

مقدرش اتجاهل من عنده حساسية واضحة من الطائفية وأقف مع من لاموا الأقباط على انتخابهم لشفيق. مقدرش اني أتجاهل واحد عنده نظرية واضحة عن أن الديمقراطية في المجتمعات الإسلامية لازم تاخد مسارات مختلفة عن الدول الغربية وإلا ستنقض على المساواة والحريات، وأرجع للناس اللي أصروا على تطبيق سيناريوهات تحول ديمقراطي من مجتمعات أغلب أفرادها ملحدين بعد عقود من الشيوعية على مجتمع أغلبه يؤمن بوجود قانون الهي.

لكن أكتر شيء يخليني متمسك بانتخاب السيسي هو إحساسي بأنه مش بس مدرك الواقع الاقتصادي لكن كمان مستعد يصارح بيه الشعب ويدفع تمن مزايدة الشعبويين. السيسي هو أول من يقول بصراحة للمطالبات الفئوية المذيلة ب"الآن وبدون الربط بتقييم الآداء" معييش! حقيقي ان الصراحة دي كانت موجودة بشكل ما قبل يناير لكنه أول من يقولها بعدها. ممكن التويتات تحاول وصمه بأنه يمن على الشعب ويبخسه حقه، لكن الحقيقة أن كل مطالبة بزيادة الآن ليست حق لأنها مستحيلة التحقيق. موقفه من التظاهر العشوائي كان الأوضح بعد شفيق: التظاهر المستمر بدون أي تنظيم ليس في مصلحة مصر وممكن يساهم في سقوطها. ممكن نشطاء تويتر يهاجموه لكن الحقيقة أن الإصرار على التطرف في التظاهر هو اللي خلى لوجهة النظر دي شعبيتها. ممكن ناس تقول له انه جه بالمظاهرات لكن الحقيقة انه هييجي بانتخابات. السيسي مقالش ان زيادة السكان مورد. هو قال أن الشعب هو الأمل وأن عمل الشعب بعد أن تتوفر له الفرصة شرط لتحقيق أي شيء. السيسي بوضوح شخصية قيادية، لكنه بوضوح مبيوعدش المصريين انه هيعمل حاجة من غيرهم. هم المسئولين عن مستقبلهم. دا مخالف لما تصورناه عن دور المرشح الانتخابي بعد يناير وهو أن يقطع على نفسه عهود ثم نعمل على ألا يستطيع تحقيقها، ثم نشيله. السيسي ببساطة بيقول لو مش عايزين تحققوا حاجة أنا شخصيا مش هحقق حاجة. ودا منرفزنا.

على الرغم من أني قلقت من عدم واقعية السيسي في تصوره لمساعدة الشعب له وتصوره لمساندة المصريين بالخارج إلا انه إدى إشارات أخرى لواقعيته. في كلامه عن حل مشكلة الطاقة السيسي اتكلم عن حل قصير الأمد للصيف القادم يتلخص في برنامج حكومي لتبديل اللمبات بلمبات موفرة الي أن يتم بناء محطات جديدة. ده كان كلامه بوضوح، طبعا تمثيله في تويتر كان مغاير لكن مش دي قضيتنا. اللي طمني انه مدرك ان الحل طويل الأمد يتمثل في محطات جديدة مش في مشروعات وهمية لا يساندها لا تكنولوجيا ولا اقتصاد للاعتماد على الطاقة الشمسية. مشكلة خطة الطاقة الشمسية دي اننا هنهمل بناء محطات جديدة ونقعد نحلم بالوهم ونتكلم كلام انشاء بينما تتفاقم المشكلة كل صيف. إدراك السيسي للمشكلة على الأقل ينم ان فيه أمل في حل طويل الأمد. هل اللمبات الموفرة حل كافي للصيف القادم؟ معرفش، هي بالتأكيد هتخفف من المشكلة لكن هل هتحلها؟ محتاجة دراسة. بس على الأقل احنا بنتكلم في حاجات ممكن نحسبها ونشوف مش في ال (*) اللي كان بيحطها نبيل فاروق ويكتب تحت (حقيقة علمية).

دليل آخر على إدراك الواقع إن السيسي شايف أهمية الاستثمار، والأهم توفير المناخ التشريعي والإداري لاجتذاب الاستثمار. بدلا من أن يتكلم عن "استرداد أراضي" هي في أصلها صحاري جرداء من مستثمرين حولوها لمدن عامرة وبدلا من أن يتكلم عن قضايا للتحرش بعقود المستثمرين الأجانب مع الحكومة المصرية هو تكلم عن اجتذاب المستثمر. ده كلام مش بيعجب وبيعرضه لهجوم شعبوي مفرداته جاهزة ومترتبة كويس بعد يناير لكن هو عنده الشجاعة انه يقول الحقيقة حتى لو معجبتش. وده اللي يهمني لأني عارف ان التحكيم الدولي هيبهدلنا تعويضات للأطراف الأجنبية بسبب العقود اللي فسختها المحاكم المصرية بدعاوي المحامين اليساريين والموضوع مش ناقص أساسا. هل إدراك السيسي لأهمية الاستثمار يطغى على إحساسه الزائف ان مثلا المصريين في الخارج هيمولوا التنمية؟ أتمنى!

هو السيسي هينجح؟

معرفش! أنا مش مغسل وضامن جنة. هو حد كان عارف أوباما هينجح ولا لأ؟ معنديش أدنى اهتمام إني أتوقع فشله عشان أقول للناس على تويتر "شفتوا"، ومعنديش أدنى خوف من اللي الناس هتقولهولي لو فشل لما يجيبوا التدوينة دي ويقولولي "شفت!" الراجل نفسه قال أنا مش هنجح لو مساعدتونيش. وحش الكلام؟ متنتخبوهوش. أنا شخصيا ممكن أسمع من المباركيين كل اللي هم عايزين يقولوه، بس مبارك مش نازل الانتخابات دي للأسف فمش هعرف انتخبه. لو شفيق كان نزل يمكن كنت فضلته على السيسي، بس هو منزلش. منزلش ليه؟ دا شيء تاني إنما هو منزلش فمش مطلوب مني إني أسانده بإن ميبقاش لي صوت. الينايرجية ممكن أتكلم معاهم للصبح بس للأسف مبعرفش أنزل احدف مولوتوف.

لو السيسي نجح كويس. لو فشل ومشي ابقوا نادوا علي الصندوق الجاي أقول لكم هنتخب مين. لو نزلتوا تولعوا في البلد عشان ترجعوا الإخوان وماله برضه أهي بلدكم.

لأن محدش وفر لي أي بديل أساسا صوتي للسيسي.