الحكم المتداولة

الحكم المتداولة في مصر غالبا غلط. و الحكم المتداولة على الانترنت بشكل اخص غلط اكتر و اكتر. على الانترنت بنخلق مجموعة من العوالم الموازية فيها "حقائق" ملهاش اي اثبات او أمارة انها حقائق غير انها بتتكرر. بس هي بتتكرر بين ناس كلها ليها نفس الرأي تقريبا. الخروج من الانترنت بيكشف للواحد شوية حاجات يمكن تكون خافية عنه. لكن لأن حياتي الطبيعية كمان هي جزء من الحقيقة يمكن اكون انا نفسي في حياتي عايش في عالم موازي. معرفش. بس على الأقل اقدر اضمن ان فيه شوية حاجات بانت لي اوضح لما بعدت عن الانترنت المصري شوية.

١ العالم التويتري: الناس عاشقة السيسي / الناس شايفة السيسي قاتل

الحقيقة: محدش عاشق السيسي. محدش بيشتري شغل التسبيل بتاعه. ولو السيسي اترشح هيكسب من اول جولة. اينعم هيكسب من غير اعادة. عارفين ليه؟ لأن الناس مش هطل زي ما احنا فاكرينهم. الناس مش ماضيين لعبد الفتاح السيسي شيك على بياض ولا هيمضوله ومش بيحبوه لسحر عيونه ولا كاريزمته. الناس عايزة تنجز وتحسم لأنهم شايفين ان اسوأ حاجة هي حالة الولا حاجة المستمرة من ٣ سنين. و شايفين في السيسي اول امل يظهر ان ممكن ننجز عشان ناكل عيش. الموضوع ابسط بكتير من تنظيراتنا. وأبسط دي مش شتيمة، تنظير هي اللي شتيمة.

٢ العالم التويتري: اوعى احسن الناس بتتعاطف مع الاخوان

الحقيقة: محدش بيتعاطف مع الاخوان ولا حد عايز يشوفهم بيقوملهم قومة ومحدش لا تعاطف مع حرائر ولا خرائر ولا نيلة. اللي بيظهروا تعاطف مفاجئ مع الاخوان، اسأل اصحابهم هتلاقيهم كانوا بينزلوا رابعة بس مش كل يوم. منهم ناس يمكن نزلوا معانا ٣٠/٦ لكن قليل منهم قوي اللي منزلش مع الاخوان من ٤/٧ بعد عزل مرسي. فيه ناس بتقرف من الداخلية وفيه ناس خسرانة ان الامن يشد حيله وفيه ناس بتتظلم وفيه ناس سبوبتها هتروح. انما بالنسبة لغالب الشعب دا لا له علاقة بالاخوان ولا التعاطف.

٣ العالم التويتري: الاستفتاء على الدستور ملوش علاقة ب ٣٠/٦ ولا بالاخوان
الحقيقة: دي بالأخص ضربت في الأوساط الفلولية بشكل عجيب. طبعا ده استهبال. في الحقيقة وفي الشارع، الاقبال الضعيف وحتى التصويت ب لا هيعتبر نقطة ضخمة في صالح الاخوان وضد الشرعية الثورية ل ٣٠/٦. التصويت بنعم واجب. ايون التصويت بنعم واجب وكل الناس اللي بتروج للتصويت بنعم بيخدموا البلد دي ومستقبلها. ممكن نقعد نرغي كتير عن فلوس مين اللي اتصرفت على الاعلانات في الشارع ولون كلمة نعم أخضر ليه. بس من الاخر هو ده اللي هيأكل عيش. احنا ممكن نفضل عايشين بنمثل على بعض اننا المفروض في السويد بس هنفضل اسمنا بنمثل على بعض. اه وبالمناسبة النتيجة غالبا نعم وبنسبة كبيرة ودي مش حاجة وحشة.