وزير التموين الخاين العميل

من ضمن كل الحاجات اللي ممكن تقرف الواحد في الأيام دي يعد ما حدث مع وزير الزراعة من اكتر الحاجات اللي الحمد لله محسساني ان مفيش حد بيفهم في البلد دي حكومة ومعارضة وشعبا.

اقالة او استقالة وزير التموين ممكن تبصلها من كذا منظور. من وجهة نظر "الدولة" هو شخص عليه شكوك ودوشة وبلبلة في الاعلام. والاخوان ممكن يستغلوه في دعايتهم في السوشيال ميديا والجزيرة تظيط. وطبعا اهم حاجة في الوقت الحالي هو ان سيادة الرئيس يحافظ على صورته وميبانش زي حسني مبارك ومش مهم وزير ولا اتنين ولا الوزارة كلها المهم نحافظ على النقاء الينايرجي اليونيوي ونسكت اْبواق الاخوان.

اما الشعب الواعي المثقف فقد أهاله ان الوزير قاعد في فندق مريح. ويقعد في فندق مريح ليه، دي فلوسنا!! ايه؟ قاعد بفلوسه؟ يبقى حرامي! جاب الفلوس دي منين ماهو أكيد سارقها من أموال الشعب. لا الوزير لازم يقعد في الكبينيه، في قلب الكينيف ذات نفسه. او ممكن يكون مرتشي وحرامي وواخد فلوس في توريد القمح عشان يحطلنا بودرة العفريت اللي اسرائيل بتصدرها عشان شبابنا يهرش في قفاه.

ممكن على فكرة يكون رفد الوزير فعلا بسبب مافيا استيراد القمح اللي مش عاجبها اي تغيير في النظام. ممكن مش بعيد، أصل من ضمن العته الينايرجي ان المصري يساعد الفساد وهو فاكر نفسه بيحاربه. يا راجل دا احنا شعب قال آيه فاكر انه هيحارب الفقر بالثورات، فعادي يعني.

بس مش دي المصيبة، لان أنا معنديش دليل ان ده اللي حصل. المصيبة الحقيقية والمؤكدة ان الراجل اتجرس واتفضح عشان بيشتغل. بيشتغل صح ولا غلط من وجهة نظرك مش مهم، المهم انه بيشتغل ومن ضمن مبادئ يناير الأساسية ان اللي بيشتغل فاسد ولازم يمشي. طبقناها على المستثمرين ورجال الاعمال والقطاع الخاص الوطني وقلنا عليهم حرامية وخالد علي الحمد لله جابلنا عليهم احكام وسحبنا منهم الاراضي وهم اتعلموا الدرس ومشيوا وركزنا في المشاريع العملاقة اللي قادت للنمو الاقتصادي الفظيع اللي احنا شايفينه اللي مش زي النمو الوهمي بناه مبارك الحمد لله. وجزء من الجو ده هو ان الحكومة اللي كان فيه اتجاه لتقليصها وزيادة فعاليتها ايام مبارك كان لازم تتضخم بكل تعيينات ما بعد يناير، والاهم هو ان اي حد هياخد قرار هيتسجن. ده درس يناير واللي الجهاز الاداري للدولة اتعلمه كويس. وزير التموين من بقايا عصر مبارك، عصر كان فيه الوزير صاحب قرار سياسي بياخده على مسئوليته عشان يسهل الأمور على الناس اللي بتشتغل، عشان البلد تمشي والنَّاس تاكل عيش ويبقى فيه دولار والكوفي ميت ميغلاش والبنزين نرفع دعمه بالتدريج مش فجأة والشركات متقفلش وتمشي عشان محدش بيمضي ورقة ولا عنده استعداد يستحمل مسئولية اي حاجة.

وطبعا دي كلها حاجات غير مقبولة في المرحلة الحالية. اتفرج لو فعلا الاستقالة طلعت صح وشوف مين شمتان ومين زعلان. مفيد الوقت ده في التفنيط.