انا فاكر قنوات النيل قبل مجيدة في رمضان. كانت أحسن مكان الواحد يشوف فيه مسلسلات رمضان. كل المسلسلات كانت بتيجي على قنوات النيل والإعلانات كانت معقولة والمواعيد مترتبة وحاجة آخر أبهة.
وبعدين حصلت مجيدة. وكان من المؤسسات اللي مجيدة نجحت في انها تطاهرها كان ماسبيرو. وطريقة الطهور كانت سجن كل من حاول تطوير المؤسسة والسماح لمذيعات شكلهم ... لطيف انهم يطلعوا يقدموا على أساس ان ميكونش فيه تفرقة وكده بالإضافة لمئات التعيينات نتيجة مظاهرات فئوية هدفها الفلوس والتعيينات وظاهرها مظاهرات ضد الفساد (كالعادة).
فانفجر التلفزيون المصري وانهار انهيار مشافوش في تاريخه. طبعا لأن مجيدة ماسكة سكينة لمخاليق ربنا فمحدش قادر يقول ان مستوى التلفزيون انهار بعد الثورة. وتم تفسير الانهيار على ان الناس قال ايه خاصمت التلفزيون المصري لأنه تجنى على مجيدة في ال١٨ يوم.
ماشي. نمشيها كده. المهم ان محدش بقى بيتفرج على التلفزيون المصري. ومنهم أنا. مع اني كنت من أشد متابعينه.
من فترة مش بعيدة اكتشفنا في البيت ان قناة النيل للدراما دونا عن بقية قنوات التلفزيون المصري بقت كنز. بما انها ما بقاش بيجيلها ريحة الاعلانات وبما ان كل الميزانية بقت بتتصرف على البطالة المقنعة اللي اتعينت فالقناة بقت تقدر تعرض عدد صفر مسلسل جديد من اللي القنوات الخاصة والعربية بيعرضوها. وبالتالي القناة بتنكش في دفاترها القديمة وتعرض مسلسلات احدثها من خمس سنين وكتير منها من التمانينيات والتسعينات. ومن غير فقرات إعلانية. لأن مفيش إعلانات.
موسيقى افتتاحية مصرية لعمر خيرت مع شريط الانيميشن اللي على قد الإيد بتاع قطاع الإنتاج. سد نوستالجيا وانفتح. نوستالجيا درامية لمسلسلات تحمل ذكريات رمضانات متتالية وسنين متتالية ومراحل متتالية لا يجمع بينهم غير انهم كانوا أفضل من النهارده وكانوا قبل مجيدة.
شفت على النايل للدراما بعد ما طاهروها مسلسل عيون. افتكرت نفسي وانا صغير، مش فاكر أصلا المسلسل كان بيتعرض أول مرة ولا إعادة لما شفته. كل اللي فاكره مصر الجديدة في أوائل التمانينات. أمي بفساتين شيك ومن غير حجاب بتتمشى معايا في شوارع الكوربة ومحدش بيضايقها. ندخل مكتبة ريحة كل الكتب اللي فيها قديمة والراجل اللي واقف فيها شكله خواجة ونشتري قصة انجليزي مستعملة عشان زي كل الناس ساعتها مكانش معانا فلوس نشتري كتب خواجاتي مش مستعملة. ونخرج فرحانين ونروح مشي عشان معندناش في البيت غير عربية واحدة.
شفت كمان ضمير أبلة حكمت. موسيقى عمر خيرت والحوار بين فاتن حمامة وأحمد مظهر فكرني برمضان عرضها. فترة حوالين حرب الخليج. مصر ابتدت تتغير. العائدون من الخليج ابتدوا ينشروا قيمهم. لكن الناس لسه سعيدة. واخدين الأمور ببساطة. متطلباتنا قليلة. فيه إحساس عام في الجو ان مصر الى انطلاق.
الانطلاق اللي محصلش. لأن النيل الدراما كمان عرضت مسلسل العائلة. رمضان كان ابتدا يدخل في الشتا. إرهاب التسعينات في أوجه. صوت أنغام وموسيقى عمار الشريعي بيغرسوا رجلينا في طين البلد واحنا بنبص تحت العربيات عشان نتأكد ان مفيش قنابل. كنا بنخاف بس كنا كلنا عارفين احنا واقفين فين وفي أنهي معسكر ومستعدين نعمل اللي لازم يتعمل علشان نخلص من الإرهاب.
دلوقتي بيعرضوا أوان الورد. فاكرين؟ الإرهاب خلص. المحور بيتبني. أكتوبر بتعمر أخيرا. الساحل الشمالي بقى مقصد سياحي بطوله وطبقة متوسطة عليا بتطلع جديد. موسيقى خالد حماد وتصميم التتر الرائع ومحتوى المسلسل البرجوازي نوعا اللي يهم الطبقة الصاعدة. بداية اتصالنا الحقيقي بالعالم. الديش يغزوا، دخول المحمول. خطوات الانترنت الأولى، إقتصاد مصر يرتبط بالاقتصاد العالمي. وبداية جيل وطبقة هيقرروا في يوم يهدوا كل شيء.
أحدث مسلسل بيعرضوه هو الحقيقة والسراب. الطبقة المتوسطة العليا في ذروتها. تنفصل تماما عن الدراما المصرية والدراما المصرية تنفصل عنها وتختار جمهور آخر.
العصر الذهبي للتدوين. ينفصل جيل الشباب وبالأخص في الطبقات الأوفر حظا اقتصاديا عن الإطار الثقافي اللي بتعبر عنه الدراما المصرية. طبقة بتسافر وبتشوف حاجات على الانترنت وبتعرف الناس بتعمل ايه بره هي طبقة بتحس انها معندهاش اهتمام باكتشاف قدرة فيفي عبده على تمثيل أدوار الشر.
وهي دي المشكلة. مبارك من خلال النجاح والنمو الاقتصادي خلق طبقة عندها قدرة شرائية واستهلاكية عالية وفجائية بدون ما يكون فيه أي إطار ثقافي يستوعب الناس دي ولا يساعدهم على استيعاب التغييرات اللي حصلت في حياتهم. فانتهى الأمر ان فيه أكتر ناس استفادت من النمو الاقتصادي في مصر هي أول ناس أنكرت انه حصل وثارت على الأوضاع وقررت انها تضرب كرسي في الكلوب لأن أكيد فيه أحسن. تسأل منين جابوا التأكد ده متلاقيش إجابة.
وبعد تلات سنين من التأكد انه لأ مكنش فيه أحسن ابتدينا نتفرج على فيفي عبده في أدوار الشر ونحس بنوستالجيا لأيام كان فيها القدر الأدنى من الآدمية والاستقرار والحياة الطبيعية والنمو.
وهنا يطرح السؤال الآتي نفسه:
هو مبارك كان مانعكم تشربوا قهوة في البلكونة وتسمعوا فيروز وتصوروا صوابع رجليكم يا ولاد الكلب؟
No comments:
Post a Comment